Mō Ngā Kura Whakatairanga Auahi Kore

'He kākano i ruia mai i Rangiātea'

Ko tā te Health Promoting Schools he whakatairanga i te hauora katoa o te whānau o te kura, mā te tango i ngā ārai e aukati ana i te ako me te whai wāhitanga.

Nā te World Health Organisation te kaupapa o Health Promoting Schools i whakatū. Ināianei kua whakapūmautia tēnei huarahi e ngā kura puta noa i te ao.

He tirohanga tā Health Promoting Schools me te Hauora i roto i te Marautanga o Aotearoa ki te katoa o te hauora o te tangata.

Hei whakatutuki pai i tēnei kaupapa me aro ki ngā tahataha katoa o te hauora, arā ki te:

1. taha tinana
2. taha whānau
3. taha hinengaro
4. taha wairua.

Haere ki te paetukutuku o Health Promoting Schools mō ētehi atu kōrero e pā ana ki a Health Promoting Schools.

Ka taea te tuku iho ngā rauemi a Health Promoting Schools hei PDF atu i te paetukutuku a HealthEd.

Ngā Huarākau i Roto i ngā Kura

Ko tā te kaupapa nei he whakarato huarākau ki ngā tamariki katoa o ētehi kura tuatahi, kura takawaenga hoki i Aotearoa. He tohutohu, he tautoko ā-pūtea hoki tā te kaupapa nei hei whakatinana i te huarahi katoa ā-kura i whakatakotoria e Health Promoting Schools.

Ko te wāhanga auahi kore o Ngā Huarākau i Roto i ngā Kura, he huarahi whānui e hāngai ana ki ngā matea ā-kura e whai wāhi ana ki ngā tikanga ā-kura, te ako mā te marautanga, me ngā hononga ā-hapori. Ka whāia e ngā kura te  Guide to a Smokefree/Auahi Kore School (2009) ( 660Kb). Ka whakamōhiotia te whānau o te kura ki ngā kōrero auahi kore. Ka tautokona ngā ākonga ki te whakawhanake pūkenga, mōhiotanga hoki e pā ana ki te kaupapa auahi kore.

Haere ki te paetukutuku o te Ministry of Health mō ētehi atu kōrero.

Health Promoting Schools Association 2010

Kei te whakatairanga te rōpū e kīia nei ko Te Taihere Hauora (National Association of Health Promoting Schools) i te mahi tahi kei waenga i ngā kura, ngā hapori me ngā rōpū whakahaere ā-hauora, ā-whakaakoranga hoki, hei whakapiki i te ora o ngā hapori me ngā taiao. Kei te mahi te rōpū nei i ngā taumata ā-motu, ā-ao hoki ki te whakarite huarahi hei whakawhitiwhiti mōhiohio, hei tautoko i te rangahau a ngā kura whakatairanga hauora, hei kaitautoko hoki ki te whakawhanake kaupapahere.

Ka taea e te tangata takitahi, ngā kura me ngā rōpū whakahaere hauora te whakauru ki tēnei rōpū. E pēnei ana te hanga o ngā māngai o te National Executive Committee, e 50 ōrau he tāngata Māori, e 50 ōrau he tāngata kē. Kei te aro te hanga o te rōpū nei ki tō rātou whāinga ki te whakamana i te whakahoatanga kei waenga i a Ngāi Māori me te Karauna. Whakapā atu ki tō māngai ā-rohe mō ētehi atu kōrero me ngā puka whakauru.