Te Kura o Rhode

Whakatairanga ai te Te Kura o te Huarahi o Rhode kei Dinsdale i Kirikiriroa i ngā hua o te noho auahi kore pērā i te nuinga o ngā kura i Aotearoa, engari nā tō rātou whai i te auahi koretanga hei hapori kotahi, kua tata ake rātou ki te tautoko i te hapori ā-kura (tae atu ki ngā kaimahi, ngā whānau, me te iwi kāinga). 
Nā te whakauru i ngā kōrero whakamutu kaipaipa ki tā rātou mahere rautaki me ngā mahere ā-tau, i whakatairanga, i tautoko hoki ai i te auahi koretanga ki ngā mahi whakatauiratanga whanonga, ki ngā rauemi tika, me ngā whāinga e taea ai te whakatutuki. I tēnei wā kei te whanakehia tonutia tā rātou hōtaka e kīia nei ko “Street by Street”, ā, ka whakaputaina ā ngā rā e heke mai nei hei tautoko i tēnei kaupapa

Mai rā anō ko te whakatairanga i ngā hua o te auahi koretanga he wāhanga o te mahere marautanga ā-kura e whakahau ana i ngā ākonga kia pai ngā whiringa hauora. Engari i te hokinga atu a ngā ākonga ki te iwi whānui ka kitea e rātou ngā whakatairanga tupeka, te akinga ā-hoa, me te whānau e kai paipa ana. Otirā kāore te kura e hiahia kia tū hei 'pirihimana patu kai paipa', heoi anō ka whakatū kaupapa kē rātou hei whakatenatena, hei tautoko hoki i a rātou e hiahia ana.

He tangata kaipaipa ētahi o ngā kaimahi ā-kura me ngā mema o te poari, nō reira ka whakapā atu te tumuaki ki te Health Sponsorship Council (HSC) kia āwhina rātou ki te whakatū kaupapa whakahaere mō ngā kaimahi me ngā mema o te poari hei āwhina i a rātou kia mutu mō ake tonu atu. Kātahi ka toro atu ki ngā mātua me ngā whānau e hiahia ana ki te whakamutu. Ka tīmata rātou ki ō rātou ake whānau, kātahi ka toro atu ki ngā tāngata o ngā tiriti me ngā kāinga e karapoti ana i te kura. Ko te hua o tēnei, ko te whakatūnga o te kaupapa whakahaere e kīia nei ko 'Street by Street'.

"Nā taku tūranga hei tumuaki ka herea au kia tū hei kaiārahi mō tēnei kaupapa whakaaro me te mahi tahi me te poari hei whakatinana i ngā aratohu kaupapa here e tika ana ki te tautoko i ngā tukanga e whakatinanatia ai hei hapori ā-kura. Ko te tangata i kōwhiria e au hei kaihautū mō te kaupapa, arā he tangata i mōhiotia whānuitia ai, i whakanuia ai hoki e te whānau. Ka tautoko hoki au i taua tangata ki te mahi tahi me tētahi nēhi hauora tūmatanui, ā, ka hui tahi mātou me ngā kaimahi o Auahi Kore ki te whakarite i ngā rautaki, ngā rauemi, ki te whakarewa hoki i te kaupapa i te tau 2011." (I te tuatahitanga ki ngā kaimahi ā-kura ka tahi, ka rua ki te hapori.)

Ka mahi tahi tonu te kura nei me ngā tini tari whakahaere i runga i te pūnaha e whakaatu nei i ngā hua o te auahi koretanga. Mā te 'hīkoi i te kōrero' me te whakaputa i ngā huarahi whakatairanga i runga i te ngākau pai e āwhinatia ai tēnei kura me ana ākonga ki te whakatutuki pai i ngā whāinga.

Shane Ngatai, Te Tumuaki o te Kura o Rhode: Ngatai@rhodestreet.school.nz

Ngā tohutoro

1 The National Administration Guidelines, (Ministry of Education) Nag: 5
2 Smoke free law in New Zealand. (Ministry of Health)